Studio Ghibli

Studio Ghibli (en chaponés: 株式会社スタジオジブリ "Kabushiki-gaisha Sutajio Jiburi") ye una interpresa chaponesa de cine d'animación con seu en Koganei, Tokio, Chapón. L'estudio ye conoixiu per os suyos largometraches animaus y tamién ha produciu cuantos curtometraches, comercials de televisión y una cinta pa televisión. A mascota d'o estudio y lo simbolo mas reconoixible ye lo personache Totoro, un esprito felín chigant d'a cinta de 1988 My Neighbor Totoro. As cintas mas taquilleras de Studio Ghibli incluyen Spirited Away (2001), Ponyo (2008) y Howl's Moving Castle (2004). L'estudio estió fundau lo 15 de chunyo de 1985 per los directors Hayao Miyazaki y Isao Takahata y lo productor Toshio Suzuki, dimpués de l'exito d'a cinta d'anime Nausicaä of the Valley of the Wind (1984). Studio Ghibli tamién ha colaborau con en o desembolique visual de cuantos videochuegos. Cinco d'as cintas de Studio Ghibli se troban entre las 10 cintas d'anime mas taquilleras realizadas en Chapón. O suyo nombre deriva d'a parola que los italianos utilizaban pa los suyos avions d'exploración d'o Sahara entre la Segunda Guerra Mundial. Tamién ye la parola italiana utilizada pa nombrar l'aire calient que bufa en iste desierto. Encara que lo nombre ye italiano, la pronuncia cuan se refiere a lo estudio ye "jibree" u "ji-bu-ri", pa adaptar-se a la fonetica d'a luenga chaponesa. A suya intención en triar este nombre yera la ideya de "fer bufar un nuevo aire en a industria de l'anime".